La primavera nel Valli

ISMAEL CARMONA* // Enos puebrus del Valli ya se respira d’otra manera: las nuvis que se enganchan enos camochus i enas peñas se desparecin i las rachas del sol atraviessan hata las hiendas i las talleras dela sombría. El cantuesu çocotrea la su cabeça con el sol airinu, comu acorpandu decisionis que namás entiendi la naturaleza. Los junquitus, sin embargu, acachan la frol vergonçúus enas laeras i barrancas.

El romeru perhuma las vereas i los xaramagus amarillean pandiquiera, peru no con tantu viciu comu las escobas. Ai semanas que las mimosas dexarun el su reluzienti amarillu i la dolçura delas sus ramas s’apagó. Barruntandu essa primavera que s’echan por estas sierras, almendrus i cirgüelus inagurarun con el su brancu las gavias i los uertus. Pallí mirandu pa una garganta branquean los cirgüelus que se cargan de froris comu una mancha delantri delos roblis que verdean al fondón.

Los herreritus se lançan entre las ramas i las çarças, s’aposan, pegan el cantíu i namás la presencia del ombri has que vaiga en cata d’otra rama más cimera dun otru arvu más cimeru. Las andorinas s’emparejan enos balconis i echan la carava enas callis solitarias delos puebrus del Valli sin que naidi las molesti. Aposau en una higuera, el chasmarín acopra el su son agúu al delas mielras pola mañana templanu i ala meyudía da pechugazus la chuchuruvía en el ríu i se baña i salta i se passea.

Los ombris, ençochaus enas jangás cotidianas, s’açorilan por causa delas oras del relós i s’avançan enas bocacallis conos cochis que los quita de vel más pallá delas rayas dela calçá. Los vendeoris sacan macacus i cestus i prantonis ala puerta, cona groria refrexandu-si en el escaparati i los llaverus recolgandu delas alcayatas. Otrus, retratistas i andarinis, entre acezíus por subil las barreras, preguntan que si quea muchu. Sin que naidi se repari, callaína, en una uerta an pie dela boca duna garganta o en una rama sobressalienti duna gavia s’abri despaciosa del su botón la primel frol del cerezu.

  • Ismael Carmona es profesor de latín y presidente del Órgano de Seguimiento y Coordinación del Extremeño y su Cultura

[Artículo publicado en El Periódico de Extremadura]

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s